طارق عادل سفيرمصر بالمملكة الأردنية يستقبل محمد نوفل الذى يتوجة الى مونديال روسيا"بالعجلة "لمؤازرة المنتخب المصرى 🚴 🇪🇬 🇷🇺️
استقبل امس طارق عادل السفير المصري بالمملكة الأردنية عمّان الشباب محمد نوفل الذى يتوجة الى مونديال روسيا"العجلة "لمؤازرة المنتخب المصرى 🚴 فى ختام المرحلة الثانية من الرحلة التى انطلق بها ابن نوفل من ميدان التحرير يوم السبت 7ابريل الجارى
نستعرض لكم بالصور واعرفوا اللي حصل بالتفصيل 🚴🤘 حكايات و مواقف محمد نوفل خلال 18يوم وحوالى 1400كم مع العجلة منذ الانطلاق و الذى عبر فيها قارتين، دولتين، 15 وحتى الان ابن نوفل يسير في الاتجاه الصحيح 🚴
ويحكى محمد نوفل قائلا : انطلقت من مصر يوم السبت 7ابريل الجارى لخوض
رحلتي لروسيا بالعجلة! لتحقيق الحلم الكبيرويبقى حقيقة أشوفكم في موسكو بعد 65 يوم هبدّل خلالهم 5000 كم مرورًا بـ 7 دول في 3 قارات ️🚴️ 🇪🇬 🇷🇺️
و قبل ما أسيب القاهرة قمت فيه بجولة بالعجل وكانت البداية من المركز الثقافي الروسي في الدقي الساعة 8 ص مرورًا بوزارة الشباب والرياضة في ميت عقبة نهاية بميدان التحرير.. ❤
وبدأ ت مغامرة جديدة وأرجع للطريق من جديد بعد أكتر من 14 شهر تحضير!
وأنطلقت من ميدان التحرير في وسط القاهرة بإتجاه مدن السويس، راس سدر، ابو رديس، الطور، شرم الشيخ، دهب نهاية بنويبع.. آخر مدينة مصرية قبل ما أتحرك للأردن.
واضاف ابن نوفل اليوم الاول بدايته كانت عظيمة بكل الناس اللي دعمتني وكانوا في ظهري وبيعافروا معايا لحظة بلحظة عشان نوصل اني اكون في طريقي لروسيا على العجلة ❤🚴
المرحلة الأولي: مصر
مع السلامة طريق السويس ، دقايق وادخل سيناء العزيزة ❤🚴
وقال مش مصدق لحد دلوقتي اني مسكت اول الطريق!!
4 ساعات في النفق في انتظار تصريح مرور العجل! يا مسهل.
بعد 9 ساعات في كمين النفق، قررنا نبات في زاوية بنزينة ونصحى بعد الفجر نتحرك في النور.. الجو ساقعة وكمين النفق ضباط وجنود متعاونين جدا والناموس عنده النهاردة وليمة 🤔🚴
يوم طويل بدايته مملة ورتيبة ونهايته سعيدة جدًا عبرنا خلاله أخيرا نفق الشهيد بعد 22 ساعة من الانتظار!
وصلت دهب أخيرًا بعد 6 أيام على الطريق، حصل فيهم حاجات كتير جدًا !! و الطريق كان صعب جدًا وكنت بوصل منُهك وأنام.. وقضيت بها يوم ثم تحركت الى دهب و منها لنويبع محطتي الأخيرة في مصر! ❤ 🚴♂️
فيه كوكتيل احاسيس غريب مسيطر عليا ما بين كوني متحمس اشوف بلد نفسي من زمان جدا اروحها وقلقان لان من الواضح ان الموضوع قلب جد وشكلي مسافر روسيا بالعجلة فعلا بس اللي متأكد منه اني مبسوط وراضي وبتعلم كل يوم جديد!
وكان هذا آخر يوم ليا في مصر وقبل ان اوصل العقبة!
في عبارة نويبع العقبة والمرحلة التانية تقترب
صباح جميل مليان هوا وصحرا وجبال وبحر من العقبة❤
البداية الحقيقية للطريق لروسيا ابتدت النهاردة! شدّوا الحزام وكونوا مستعدين تعيشوا معايا المغامرة لحظة بلحظة 🚴🤘
مين قال المصريين بياكلوا بعض في الغربة!
والله ما شوفت منهم الا الضيافة وحسن الاستقبال والروح المصرية الجميلة، مرتاح ومتطمن وانا بينهم ومبسوط اني اتعرفت عليهم.
استراحة بير مذكور، الأردن
بعد 4 ساعات، العجلة جاهزة تكمل المشوار لعمّان!
اختبار لطيف وقرصة ودن حلوة عشان الواحد يتأكد من العدة كاملة بعد كده..
صباح الخير من استراحة بير مذكور.
وصلت متأخر بعد جنزير العجلة ما اتقطع قبل الاستراحة بحوالي 15كم وملقتش الزرجيتة (آداة الصيانة) ومكانش قدامي حل الا اني اقف عى الطريق يمكن عربية تاخدني في سكتها لأي مكان فيه عمار او إني اخيم في مكاني في وسط الصحرا حرفيا، بعد اكتر من ساعتين انتظار ربنا كرمني بعربية وقفتلي ووصلتني للاستراحة.
نصبت الخيمة وربطت العجلة في شجرة ونمت نوم عميييق وانا مستقر في وجداني فكرة واحدة بس: هل كان فعلا افضل اختيار انى اسافر لوحدي بدون رفيق؟
في استراحة في بلدية الريشة
من وين انت؟ مصر
ام الدنيا والله! تلعب شطرنج؟ يلا بينا
ولم يكن يدري ان المصريين لعيبة شطرنج جامدين جدا
اول مرة انام في نقطة شرطة! وكانت فعلا اسم على مسمى ( رحمة ) .. سرير، حمام سخن، اكل، تكييف، والاهم الصحبة الحلوة ❤🚴
البحر الميت، اكتر بحار العالم ملوحة واكبرها كثافة!!
والفرصة المثالية لكل اللي مبيعرفش يعوم لانك هتطفوا غصب عنك ومفيش حد بيغرق!!
اليوم كان طويل وممتع ومختلف وحصل فيه أحداث كتيرة هتتحكي كلها خلال الايام التلاتة الجاية، الحدث الاهم إني بكرة هختم رحلتي في الاردن وأوصل عمّان!! ❤🚴🤘
مرحبا بكم من اخفض نقطة على سطح الأرض، 405 متر تحت سطح البحر!! انتظروا تقرير كامل عن المتحف وعن الكهف اللي قابلته بالصدفة ❤🚴
تعليقات
إرسال تعليق