محمد نوفل.. المصري المسافر بالعجلة لكأس العالم بروسيا يناشد وزير الشباب و الرياضة حل مشكلة تأشيرة دخول أوكرانيا

  كتب : عبده العالمية
فى البداية يقول محمد نوفل الشاب المصرى المسافر بالعجلة لكأس العالم بروسيا لمؤازرة المنتخب المشارك بالبطولة بعد غياب دام لربع فرن
من وقت ما وصلت بوخارست وانا حاسس بضيق ومستنى اللحظة اتحرك فيها من جديد، ماشي في الشارع لقيت إعلان هاف ماراثون بوخارست! قُلت عظيم، حدث كبير وهنزل أجري وأفك الضغط عن نفسي شوية، اشتركت في جرية صغيرة وأخدت تيشرت الإيفنت والرقم وبقيت مستعد خلاص يوم الايفنت راحت عليا نومة وصحيت متأخر قولت لازم أقاوم كسلي وأنزل وأشوف الفاعليات اللي بعد الجرية حتّى وصلت ملقتش اي حاجة من ريحة الهاف ماراثون إلا البوابة دي، اتصورت معاها وروّحت أكمل نوم 😂
واضاف ابن نوفل‏ ‏‏ حدث تطورات جديدة بعد مقابلة معالي السفير المصري في بوخارست ورد وزارة الشباب على امكانية دعمها في الأزمة الحالية والنتيجة كالتالي إن مفيش أي جهة هتقدر تساعد بالنسبة لأوكرانيا وتقريبا الأوبشن ده خلاص انتهى تمامًا للأسف
هبدأ أشتغل على البدايل اللى تم دراستها وهي طيران ل دولة من التلاتة دول ( بيلاروسيا ، ليتوانيا ) ومنها هرجع أكمل طريقي من جديد بالعجلة لموسكو إن شاء الله أو ( جورجيا ) وأكمل بالعجلة لمدينة جروزني: المدينة اللي هيكون فيها المنتخب .. وده هيبان خلال الأيام القليلة الجاية من خلال أي تأشيرة هعرف أخدها ..
قائلا : أنا حقيقي بشكركم بعمق شديد على قدر الحب والإهتمام والدعم خلال الأيام اللي فاتت وممتن جدًا لكل حد رد غيبتي أو دافع عني وإن شاء الله ربنا مايضيعش تعبنا والأمور تمشي الفترة الجاية
ووجة محمد نوفل شكر خاص وكبير جدًا لسفارتنا هنا في بوخارست لإهتمامها بإن عملية خروجي من هنا تتم في أسرع وأفضل شكل ممكن وبشكل خاص معالي السفير صلاح عبدالصادق والقنصل المستشارة داليا طنطاوي والأستاذ حاتم شكري
كما شرح نوفل تفصيل الرحلة ردا على هجوم بعض الناس علية قائلا :
أنا محمد نوفل.. المصري المسافر لكأس العالم في روسيا بالعجلة، ردود فعل واسعة وكبيرة جدًا خلال الفترة اللي فاتت مابين إيجابية وسلبية إلا إنه المعظم ميعرفش الا معلومات سطحية عن أنا بعمل ايه؟ وليه مختار العجلة وسيلة سفري!
الحقيقة إني لا شخص فاضي ولا معايا فلوس كتير ولا عاوز أدخل موسوعة جينيس ولا أي كلام من اللي اتقال عليّا.. انا مخلص كلية تجارة جامعة حلوان 2016 وبحاول أتعلم وآخد خبرة في المجال اللي بحبه وعاوز أشتغل وأكمل فيه وهو إنه أعمل محتوى عربي مختلف تمامًا عن اللي موجود من خلال السفر بالعجلة وده عن طريق الإختلاف الكبير اللي بشوفه عالطريق ( اللي استحاله تشوفه او تحس بيه لو سافرت بعربية او طيارة ) فبقابل ناس كتير مختلفة بشوف أماكن منعرفش عنها حاجة بسمع عن قصص إنسانية ملهمة وعظيمة بمرّ بأوقات صعبة وأوقات حلوة وغيرها من الأمور اللي في الآخر بتخرج في الآخر في شكل " فيلم وثائقي " بيحكي عن التجربة ونشوف من خلالها الحدث الكبير ( كاس العالم مثلا ) لكن من منظور مختلف تمامًا عن اللي كل الناس بتشوفه بيه.. وكمثال على ده رحلتي الأخيرة للجابون واللي اتعملت فيلم وده البرومو الخاص بيه ( https://goo.gl/qU4D9R ) ولسه متعرضتش عالسوشيال ميديا لحقوق الملكية الخاصة بشركة الإنتاج.
الحقيقة إن طول السفر بيكون فيه عقبات كتيرة وده جزء من الرحلة نفسها إلا إن المشكلة اللي أنا فيها حاليًا أكبر من إن أقدر أحلها لوحدي.. أنا وصلت من 3 أيام بوخارست - رومانيا - وللأسف مش قادر أحصل على تأشيرة دخول أوكرانيا ( الدولة الأخيرة قبل الوصول لروسيا ) وتم إبلاغي من خلال السفارة المصرية هنا على لسان القنصل الأوكراني إن الطريقة الوحيدة لقبول ورقي هي إن التدخل يكون من وزير الخارجية المصري ويتواصل مع الوزير الأوكراني واللي يقدر يعمل استثناء عشان يقبلوا ورقي ( وده كله عشان مش معايا إقامة في دولة أوروبية وكان فيه سبب قاهري خلاني معرفش أخدها من القاهرة) لحد دلوقتي مش في إيدي حاجة أعملها للأسف أكتر من إني أحاول أقول هنا عالسوشيال ميديا لعل وعسى الموضوع يوصل لمسئولين في مصر يقدروا يساعدوا وأولهم طبعًا المهندس Khaled Abd Elaziz وزير الشباب والرياضة واللي المبادرة دي تحت رعايتها .. أو يوصل لوسائل الإعلام المصرية واللي في إيديها كتير تعمله..
واختتم نوفل الحديث قائلا : تعب أكتر من 14 شهر مهدد إنه يروح على الفاضي لو الأزمة حاليًا متحلتش.. وربنا يعلم حجم التعب والمجهود اللي اتعملوا عشان أقدر أكمل طريقي في حاجة بحبها برغم من صعوبته ومخاطره وردود فعل الناس السلبية في معظم الأحيان.. إلا إن إيماني بربنا وبنفسي وبكل اللي حواليا وبيدعموني من أول يوم مخلي لسه عندي أمل في إني أوصل موسكو .. بالعجلة
 يذكر ان محمد نوفل كان قد غادر مصر من ميدان التحرير يوم السبت 7ابريل الماضى  بالعجلة متوجة الى روسيا وان هذه المغامرة جاءت مؤازرة للمنتخب المصري في مونديال روسيا ولتعرف على البلدان الاخرى وعادات وتقاليد الشعوب، وبين نوفل ان ابرز المعيقات التي تواجهه تغير المناخ من منطقة الى اخرى.